Родная мая вёска! Ці памятаеш ты яшчэ мяне? Калісьці ў дзяцінстве я прыязджаў да цябе кожнае лета. А пасля дарослае жыццё, праца, сям'я захапілі так, што не быў тут ужо амаль дзесяць гадоў. Ледзь пазнаў нашу вуліцу: хаты ўсе новыя, дрэвы, што былі маленькімі, павыросталі да неба. І толькі адчуванні засталіся тымі, што і ў дзяцінстве: спакой і бяспека. Абяцаю, буду часцей прыязджаць да цябе, мая вёска. І абавязкова прывязу сюды сваіх дзяцей, каб раздзяліць з імі свае ўспаміны.