Жаба і Салавей.

На  ўскрайку лесу жыў галасісты Салавей.  З  вечара і  да позняй ночы зачароўваў ён лясных жыхароў сваім салаўіным спевам.  

Непадалёку ад лесу працякала невялікая рачушка, дзе жыла балотная  Жаба. З задавальненнем слухала яна залівісты спеў Салаўя і кожны раз марыла аб знаёмстве з гэтым лясным спеваком.

І вось аднойчы адбылася гэта жаданая сустрэча. Жаба папрасіла Салаўя праспяваць для яе. Па ўсім лесе гучна разнесліся звонкія, пералівістыя гукі салаўінай песні. Жаба з задавальненнем слухала гэту чароўную мелодыю. А потым прапанавала сваю песню. 

Салавей падрыхтаваўся ўважліва слухаць. Жаба пачала квакаць усё грамчэй і грамчэй.  Салавей спачатку разгубіўся, але Жаба “спявала” з такім натхненнем, што ён не змог яе спыніць. Прысеўшы на галінку, Салавей з павагай даслухаў жабчыну песню да самага канца.

І з таго часу, кожным летнім вечарам,  Салавей і Жаба наладжваюць свой сумесны канцэрт для ўсіх лясных жыхароў.