Мята (Mentha) — род кветкавых раслін сямейства губакветных.

Налічваецца каля 25 відаў. Пашыраны пераважна ва ўмераным поясе паўночнага паўшар'я. Некалькі відаў здаўна культывуюцца ў многіх краінах як эфіраалейныя і лекавыя расліны. На тэрыторыі Беларусі 3 дзікарослыя віды: мята водная, мята даўгалістая, мята палявая. Трапляюцца на палях, па берагах рэк і азёр. Вырошчваюць пераважна мяту перцавую — гібрыд мяты воднай і мяты каласковай.

Шматгадовыя травяністыя расліны вышынёю да 1,2 м. Лісце суцэльнае, зубчастае або пілаватае. Кветкі дробныя, 1- і 2-полыя, ружавата-ліловыя ў пазушных кальчаках або коласападобных ці галоўчатых суквеццях. Плод — чатырохарэшак.

Лекавыя, эфіраалейныя, харчовыя, меданосныя расліны. Трава мяты мае ментол, ужываецца як лекавы сродак. Мятны алей выкарыстоўваюць у парфумерыі і харчовай прамысловасці.